ശ്രീരംഗപട്ടണത്ത് ചെന്നാല് പ്രധാന കാഴ്ച്ചകളെല്ലാം ടിപ്പു സുല്ത്താനെ ചുറ്റിപ്പറ്റിത്തന്നെയാണ്.
ടിപ്പു കൊല്ലപ്പെട്ട ഇടം, ടിപ്പുവിന്റെ സമ്മര് പാലസ്, ടിപ്പുവിന്റെ വാട്ടര് ജെയില്, ടിപ്പുവിന്റെ ശവകുടീരം അങ്ങനെ നീളുന്നു കാഴ്ച്ചകള്. ശവകുടീരത്തിനകത്ത് സായിപ്പിന്റെ ഉറക്കം കെടുത്തിയ ടിപ്പുവിനൊപ്പം പിതാവ് ഹൈദരാലിയും മാതാവ് ഫക്രുനിസ്സയും അന്ത്യവിശ്രമം കൊള്ളുന്നുണ്ട്.
മുന്നില് ജലസംഭരണി. പിന്നില് കന്യാവനങ്ങള്. എല്ലാറ്റിനും മുകളില് കാറ്റിന്റെ തേരിലേറി വന്ന് മലകളില് മുട്ടിയുരുമ്മി പെയ്യാന് തയ്യാറെടുത്ത് നില്ക്കുന്ന മേഘങ്ങള്. മഴയായി അവ പെയ്തിറങ്ങുമ്പോള് മലകളിലൊക്കെ വെള്ളിയരഞ്ഞാണങ്ങള് തൂക്കിയിട്ടിരിക്കുന്നതുപോലെ. കുറേ നേരം ഇതൊക്കെയങ്ങനെ നോക്കി നില്ക്കുമ്പോള്, ശരിക്കുള്ള ഉത്തരം ഇപ്പോഴും കിട്ടാത്ത ആ ചോദ്യം വീണ്ടും മനസ്സില് പൊന്തിവരും. കേരളത്തിന് ആരാണ് ദൈവത്തിന്റെ സ്വന്തം നാട് എന്ന അര്ത്ഥവത്തായ ആ പേരിട്ടത് ?
പറമ്പികുളം-ആലിയാര് ജലസംഭരണിയ്ക്ക് മുന്നില് നിന്നൊരു ദൃശ്യം.
കുടകില് പോകാന് അവസരം കിട്ടിയാല് കുശാല് നഗര് കൂടെ സന്ദര്ശിക്കാതെ മടങ്ങിയാല് അതൊരു തീരാനഷ്ടം തന്നെയാണ്. കുശാല് നഗറിലെ ടിബറ്റ് കോളനി തന്നെയാണ് അതിന്റെ പ്രധാന കാരണം. കുറച്ച് നേരം കുശാല് നഗര് വഴിയൊക്കെ കറങ്ങി നടന്നാല് ടിബറ്റില് എവിടെയോ ആണ് ചെന്ന് പെട്ടിരിക്കുന്നതെന്ന തോന്നല് ആര്ക്കും ഉണ്ടാകും. അത്രയ്ക്കധികം റ്റിബറ്റുകാരും ലാമമാരുമാണ് കുശാല് നഗറിലെ കോളനികളില് ജീവിക്കുന്നത്.
കുശാല് നഗരിലെ ഗോള്ഡന് ടെമ്പിളില് ഇത് ആറാമത്തെ പ്രാവശ്യമാണ് ഞാന് പോകുന്നതെങ്കിലും, ഇത്രയധികം ലാമമാരെ ഒരുമിച്ച് കാണാനായത് ഇപ്പോള് മാത്രമാണ്. കാണാക്കാഴ്ച്ചകളുടെ കൂട്ടത്തിലേക്കിതാ കുശാല് നഗറിലെ ഗോള്ഡന് ടെമ്പിളില് നിന്ന് ഒരു ദൃശ്യം.
1612ല് ആണ് വടക്കന് ഗോവയില് പോര്ച്ചുഗീസുകാര് അഗ്വാഡാ (Aguada) ഫോര്ട്ട് നിര്മ്മിക്കുന്നത്. അഗ്വാഡാ (Aguada) എന്നാല് Watering Place എന്നാണ് പോര്ച്ചുഗീസ് ഭാഷയിലെ അര്ത്ഥം.
കോട്ടയ്ക്കകത്തുകൂടെ ഒഴുകുന്ന ഒരു ശുദ്ധജല ഉറവ് കോട്ടയില്ത്തന്നെ ശേഖരിക്കപ്പെടുകയും ഈ വഴി കടന്നുപോകുന്ന കപ്പലുകള്ക്ക് വിതരണം ചെയ്യുകയുമായിരുന്നു പതിവ്. 23,76,000 ഗാലന് വെള്ളം ശേഖരിക്കാന് കോട്ടയ്ക്കുള്ളിലെ ടാങ്കിന് ശേഷിയുണ്ട്. ജലശേഖരണവും വിതരണവും നടത്തുന്ന മറ്റൊരു കോട്ട ഞാന് കണ്ടിട്ടില്ല. അതുകൊണ്ടുതന്നെ അഗ്വാഡാ ഫോര്ട്ട് എനിക്കൊരു കാണാക്കാഴ്ച്ച തന്നെയായിരുന്നു.
പറമ്പികുളം ഡാമിന്റെ കാച്ച്മെന്റ് ഏരിയയില് ബാംബൂ റാഫ്റ്റിങ്ങിന് തയ്യാറെടുക്കുന്ന ഫോറസ്റ്റ് ഗാര്ഡും തുഴക്കാരും. നാല് തുഴക്കാരെങ്കിലും വേണം ഒരു റാഫ്റ്റിനെ മുന്നോട്ട് നീക്കാന്. മുളകള് കൂട്ടിക്കെട്ടി ഉണ്ടാക്കിയ ബാംബൂ റാഫ്റ്റില് കയറി യാത്ര ചെയ്യാന്, കോരിച്ചൊരിയുന്ന മഴയത്ത് ആരും വരില്ലെന്ന് കരുതുന്നവര്ക്ക് തെറ്റി.
പ്രകൃതിയിലേക്കുള്ള മടക്കമാണ് ഇത്തരം യാത്രകള്. പറമ്പികുളത്ത് ഇതുപോലുള്ള നിരവധി വിസ്മയങ്ങള് സഞ്ചാരികളേയും കാത്തിരിക്കുന്നുണ്ട്. കണ്ടില്ലെന്ന് എത്രനാള് നടിക്കാനാവും യാത്രികര്ക്കും പ്രകൃതിസ്നേഹികള്ക്കും ?
നടുക്കടലില് എണ്ണക്കിണറും താങ്ങി നില്ക്കുന്ന ഒരു പ്ലാറ്റ് ഫോം ആണ് ചിത്രത്തില്. ഞങ്ങള് എണ്ണപ്പാടത്തൊഴിലാളികള് ഇതിനെ ജാക്കറ്റ് എന്നും വിളിക്കാറുണ്ട്.
പ്ലാറ്റ്ഫോമിന്റെ മദ്ധ്യഭാഗത്തായി (ഇടത്തുനിന്നും വലത്തുനിന്നും മൂന്നാമത് ) കാണുന്ന മങ്ങിയ വെളുത്ത നിറത്തിലുള്ള പൈപ്പാണ് എണ്ണക്കിണര്. കൃത്യമായി പറഞ്ഞാല് അത് എണ്ണക്കിണറിന്റെ ഒരു കവചം മാത്രമാണ്. കേസിങ്ങ് എന്ന് ഞങ്ങളതിനെ പറയും. അതിനുള്ളിലായിരിക്കും ട്യൂബിങ്ങ് എന്ന സാക്ഷാല് എണ്ണക്കിണര്.
നാടന് കുഴല്ക്കിണറുകളെപ്പോലെ തന്നെയുള്ള ഒരു എണ്ണക്കിണറിന്റെ ട്യൂബിങ്ങിലൂടെയോ കേസിങ്ങിലൂടെയോ മനുഷ്യജീവികള്ക്ക് കടന്നുപോകാനൊന്നും പറ്റില്ല. ഇനി അഥവാ പോകാന് സാധിച്ചാലും ഭൂമിക്കടിയില് കിലോമീറ്ററുകളോളം ആഴത്തിലേക്ക് നീളുന്ന എണ്ണക്കിണറിലെ അതിസമ്മര്ദ്ദവും ഉഗ്രതാപവും താങ്ങാന് ആര്ക്കുമാവില്ല.
ഇതൊക്കെയാണെങ്കിലും ഞങ്ങള് എണ്ണപ്പാടത്തുള്ളവര് സ്ഥിരം കേള്ക്കാറുള്ള ഒരു ചോദ്യമുണ്ട്.
“നിങ്ങള് ഈ എണ്ണക്കിണറിലേക്കൊക്കെ ഇറങ്ങിച്ചെല്ലാറുണ്ടോ ? “
ഞങ്ങള്ക്ക് ഇറങ്ങിച്ചെല്ലാനാകില്ലെങ്കിലും ഈ ജാക്കറ്റിലിരുന്ന്, പല മെക്കാനിക്കല് ഉപകരണങ്ങളും ഇലക്ട്രോണിക്സ് ഉപകരണങ്ങളും ഞങ്ങള് താഴേക്ക് കൊണ്ടുപോകുകയും തിരിച്ചെടുക്കയും ചെയ്യാറുണ്ട്. അത്തരം ഒരു ജോലിക്കിടയില് ഷാര്ജയിലെ ഒരു ഓഫ്ഷോര് എണ്ണപ്പാടത്തുനിന്ന് പകര്ത്തിയ ചിത്രമാണിത്. ചിത്രമെടുത്തിരിക്കുന്നത്, ജാക്കറ്റിലേക്കെത്താന് ഞങ്ങള് പലപ്പോഴും ആശ്രയിക്കുന്ന ബോട്ടുകളില് ഒന്നില് നിന്നാണ്.
എണ്ണപ്പാടത്ത് മിക്കവാറുമിടങ്ങളില് ക്യാമറ നിഷിദ്ധമാണ്. ഈ ഒരു എണ്ണപ്പാടത്ത് (ഏതാണെന്ന് പറയില്ല) ക്യാമറ അനുവദിക്കുമെന്നുള്ളതുകൊണ്ടുതന്നെ ഇവിടെച്ചെന്നാല് പടം പിടുത്തം ഞങ്ങളൊരു ആഘോഷമാക്കാറുണ്ട്. അത്തരം ചില ചിത്രങ്ങള് ദാ ഇവിടെയും ഇവിടെയും ഇവിടെയുമുണ്ട്.
ഇന്ത്യക്കാര് കാറുകള് വാങ്ങിക്കൂട്ടാന് തുടങ്ങിയതുകൊണ്ടാണ് ഓയല് വില വര്ദ്ധിച്ചതെന്ന് പ്രസ്ഥാവനയിറക്കിയ ബരാക്ക് ഒബായ്ക്ക് ഈ ചിത്രം സമര്പ്പിക്കുന്നു.
കര്ണ്ണാടകയിലെ ഗോകര്ണ്ണത്തിനടുത്തുള്ള ‘ഓം‘ ബീച്ച്.
ബീച്ചിന്റെ നടുവിലെ ഭാഗം കടലിലേക്ക് തള്ളിനില്ക്കുന്നതുകൊണ്ട് ‘ഓം‘ അഥവാ ‘ഉ‘ എന്ന ഹിന്ദി അക്ഷരം പോലെയാണ് ബീച്ചിന്റെ ആകൃതി. പേര് വീഴാന് അതില്ക്കൂടുതലെന്ത് കാരണം വേണം?
ഓം ബീച്ചിന്റെ കുറേക്കൂടെ നല്ല ഒരു ചിത്രം കാണാന് ഇതു വഴി പോകൂ.
സണ്ബാത്ത് ഈ സായിപ്പിന്റേം മദാമ്മേന്റേം കുത്തകയൊന്നുമല്ലല്ലോ ?
എണ്ണതേക്കാതെ കിടന്നാലും ഉണങ്ങാന് പറ്റ്വോന്ന് ഞങ്ങളൊന്ന് നോക്കട്ടെ.
നോര്ത്ത് ഗോവയിലെ ബീച്ചുകളൊന്നില് നിന്നൊരു കാഴ്ച്ച.
വഴി തെറ്റി ആഴക്കുറവുള്ള കടലില് പെട്ടുപോയതാണവള് . ഇപ്പോള് നെഞ്ചോളം വെള്ളത്തിലൂടെ നടന്നാല് കരയില് നിന്ന് കഷ്ടി 100 മീറ്റര് മാത്രം അകലെ കിടക്കുന്ന അവളുടെ അടുത്തെത്താം, കയറേണി വഴി മുകളിലേക്ക് പിടിച്ച് കയറാം.
തിരകളോട് തോറ്റ് കടല്ക്കരയില് അടിഞ്ഞ അവളെ ലൈഫ് ഇന്ഷൂറന്സ് കമ്പനിയും തോല്പ്പിച്ചു. ഇന്ഷൂറന്സ് പണം കിട്ടാത്തതുകൊണ്ട് പൊളിച്ചടുക്കി നേരേ ചൊവ്വേ ഒരു ശവസംസ്ക്കാരത്തിനുപോലും സാദ്ധ്യതയില്ലാതെ തുരുമ്പെടുത്ത് നാശമായിക്കൊണ്ടിരിക്കുന്നു ‘റിവര് പ്രിന്സസ്സ് ‘ എന്ന ഈ കപ്പല് .
നോര്ത്ത് ഗോവയിലെ കാന്ഡോലിം ബീച്ചില് നിന്നൊരു കാഴ്ച്ച.
© Free Blogger Templates 'Photoblog II' by Ourblogtemplates.com 2008
Back to TOP
